უძრავი ქონების გაყიდვების სფეროზე გავლენის მომხდენ ფაქტორებს შორის კვლავ იპოთეკური სესხების გაცემის გართულება, სამშენებლო რეგულაციები, ლარის კურსი მოიაზრება. 2019 წელი ამ სექტორისთვისაც გაყიდვების კლებასთან ასოცირდება.
უძრავი ქონების სააგენტოების ნაწილი ვარაუდობს, რომ ქალაქის ცენტრში 2020 წლისთვის ბინები გაძვირდება ნაკლები მიწოდებისა და გაზრდილი მოთხოვნის გამო. მეორეს მხრივ კი 2020 წლის არჩევნების მოახლოებამ შეიძლება მოსახლეობას ლოდინისკენ უბიძგოს და ბევრმა თავი შეიკავოს.
„2018 წელს სასესხო რეგულაციების შეცვლის დაანონსებამ დიდი რაოდენობით სესხების გაცემა და ბევრი ბინის გაყიდვა გამოიწვია. ბუნებრივია, 2019 წელს ეს რაოდენობა 10-20 პროცენტით შემცირდა. თუმცა, წელს აქტიური მოთხოვნა ფიქსირდება მიწის ნაკვეთების შეძენასთან დაკავშირებით. ძირითადად, მიწის ნაკვეთები სჭირდებათ დეველოპმენტისთვის. ქალაქის ცენტრში, სადაც შეიძლებოდა კარგი საცხოვრებელი კორპუსების აშენება, უკვე ყველა დაკავებულია, ამიტომ განვითარება მიდის გარეუბნების მიმართულებით. ბევრი მოთხოვნა შემოგვდის გარეუბნებში მიწის ნაკვეთების შეძენაზე. 2019 წელს შეინიშნება, რომ განვითარება ნელ-ნელა სცდება ქალაქის ცენტრს.“- ამბობს უძრავი ქონების სააგენტოს მფლობელი ნინო გედევანიშვილი.
ზურაბ ლაჩაშვილს(უძრავი ქონების სააგენტოს მფლობელი) მიაჩნია, რომ უძრავი ქონების ბაზარზე რეალობის შეცვლა შესაძლებელია ქვეყანაში ფინანსური პოლიტიკის სწორად გატარების შემთხვევაში.
„2019 წელს საბანკო რეგულაციებმაც იმოქმედა, ლარის კურსმაც, მშენებლებს გარკვეული რეგულაციები დაუწესდათ, ამან განაპირობა ფასების აწევა და რეალობა ისაა, რომ 2018 წელთან შედარებით გაყიდვები მინიმუმ 10-15 პროცენტითაა შემცირებული. ქალაქგარეთ, დიღმის მასივში, დიდი დიღომში და გლდანის რაიონში უფრო დაბალფასიანი ბინებია და აქ უფრო ინტენსიურია ბინების შეძენა. უძრავ ქონებაზე ფასების ფორმირება 2020 წელს ქვეყანაში ფინანსურ პოლიტიკაზე და შიდა სტაბილურობაზეა დამოკიდებული.“ - ამბობს ლაჩაშვილი.
„თიბისი კაპიტალის“ კვლევის მიხედვით, 2018 წლის განმავლობაში სულ 550,000 კვადრატული მეტრის მშენებლობაზე გაიცა ნებართვა, რაც 47%-ით ნაკლებია 2017 წლის მაჩვენებელზე, როდესაც ნებართვა 1,044,000 კვადრატულ მეტრზე გაიცა. იმის გათვალისწინებით, რომ საშუალოდ ნებართვის გაცემიდან მშენებლობის დასრულებამდე 3 წელი გადის, მიწოდების შემცირება 2021 წლისთვის არის ნავარაუდები.
"თიბისი კაპიტალის" კვლევითვე, 2016-2018 წლებში იპოთეკური სესხების პორტფელი 31%-ით გაიზარდა. თუმცა, 2019 წლის იანვრიდან ძალაში შევიდა ახალი საბანკო რეგულაციებით ბანკებს მოქალაქეთა შემოსავლების დეტალური ანალიზის გარეშე სესხის გაცემა შეეზღუდათ, განისაზღვრა საშემოსავლო ჯგუფები და თითოეულისთვის დაწესდა სესხის მომსახურების მაქსიმალური კოეფიციენტი. დადგინდა ერთიანი ჭერიც – იპოთეკური სესხის ხანგრძლივობა არ უნდა აჭარბებდეს 15 წელს.
„თიბისი კაპიტალის“ გათვლების მიხედვით, მოქალაქის შემოსავალი მინიმუმ 4,800 ლარი უნდა იყოს, რათა მან აღნიშნული რეგულაციის მოთხოვნა დააკმაყოფილოს და წარმატებით გაუმკლავდეს 127,000 ლარის ღირებულების იპოთეკას, რაც საშუალო ზომის – 65 კვადრატული მეტრის ბინის შესაძენად დასჭირდება.
„თიბისი კაპიტალის“ კვლევის მიხედვით, 2021 წლიდან თბილისის უძრავი ქონების ბაზარზე მიწოდება შემცირდება, რაც მერიის მიერ სამშენებლო ნებართვების გაცემის გამკაცრებით იქნება გამოწვეული.
წყარო: "კომერსანტი"
ბელა გელაშვილი
ავტორი