ტრადიციული რეწვისა და დიზაინის თბილისის მესამე საერთაშორისო სამიტი „ეთნოფესტი 2020“ ონლაინ ფორმატში გაიხსნა. საქართველოს განათლების, მეცნიერების, კულტურისა და სპორტის სამინისტროს მხარდაჭერითა და ხელოვნების საერთაშორისო ცენტრის ორგანიზებული ღონისძიება მსურველს 100-ზე მეტი დიზაინერისა და ოსტატის ხელნაკეთი ნივთების დათვალიერებისა და, სურვილის შემთხვევაში, მათი შეძენის შესაძლებლობას აძლევს.
„ეთნოფესტი“ ტრადიციული რეწვის, დეკორატიულ-გამოყენებითი ხელოვნებისა და დიზაინის განვითარებისა და სტიმულირების ფართომასშტაბიანი პლატფორმაა. სამინისტროს ცნობით,მისი მიზანია როგორც ადგილობრივი, ისე საერთაშორისო საზოგადოებისთვის ქართველი დიზაინერების, ოსტატებისა და მწარმოებლების წარმოჩენა და მათი პროდუქციის პოპულარიზაცია; დარგის ეკონომიკური პოტენციალის გაძლიერება მასში ახალი ტექნოლოგიების ინტეგრირების საშუალებით; ვებგვერდის ვიზიტორისთვის მრავალფეროვანი, ორიგინალური და ხარისხიანი პროდუქციის წარდგენა; ტრადიციული რეწვისა და ხელოსნობის საწარმოების ბიზნესის უნარების გაძლიერება სხვადასხვა საგანმანათლებლო ღონისძიების საშუალებით და თბილისის რეგიონის რეწვისა და ხელოსნობის ცენტრად ჩამოყალიბების ხელშეწყობა.
