აჭარის უმაღლეს საარჩევნო კომისიას მომდევნო ხუთი წლის განმავლობაში უკვე მეორე ვადით, მოქმედი თავმჯდომარე პარმენ ჯალაღონია უხელმძღვანელებს.
აჭარის უმაღლესი საბჭოს დღევანდელ რიგგარეშე სხდომაზე ჯალაღონიას კანდიდატურას მხარი 13-მა დეპუტატმა დაუჭირა.
კენჭისყრის პროცესში ოპოზიცია ბოიკოტის ნიშნად არ მონაწილეობდა. პროცესში მონაწილეობა არ მიუღია დამოუკიდებელ დეპუტატს, ირაკლი ჩავლეიშვილს.
შეგახსენებთ, აჭარის უსკო-ს თავმჯდომარის არჩევა ხმაურის ფონზე მიმდინარეობდა. მის წარდგენას "ნაციონალური მოძრაობის" დეპუტატები აპროტესტებდნენ და აცხადებდნენ, რომ ჯალაღონიას არჩევნების გაყალბებაში ერთ-ერთი მთავარი წვლილი მიუძღვის.
ისინი კენჭისყრამდე კანდიდატთან გასაუბრებას და კითხვების დასმას ითხოვდნენ.
