საქართველოს ეკონომიკისა და მდგრადი განვითარების მინისტრის ნათია თურნავას ინფორმაციით, საქართველო-ევროკავშირის საბჭოს დღევანდელ სხდომაზე ორი ეკონომიკური საკითხიო განიხილება. მისი განმარტებით, ქართული მხარე დასვამს შავი ზღვის გავლით სატრანსპორტო-ლოჯისტიკური სერვისების განვითარების, ასევე თავისუფალი ვაჭრობის გაძლიერების საკითხებს.
„ძალიან მაღალ დონეზე ვმონაწილეობთ ასოცირების საბჭოს სხდომაში. ასოცირების საბჭო არის ის პლატფორმა, სადაც განიხილება ასოცირების შეთანხმების ფარგლებში ჩვენი პროგრესი. მართლაც ბევრი რამ გვაქვს სათქმელი და თავი მოსაწონი იმით, რომ საკმაოდ სწრაფად მიდის ევროპული რეფორმები, ზედმიწევნით ვასრულებთ ჩვენზე აღებულ ვალდებულებას, განსაკუთრებით თავისუფალი ვაჭრობის შეთანხმების ფარგლებში, რაც უშუალოდ ეკონომიკის სამინისტროს ჩართულობაც არის. ორი მნიშვნელოვანი საკითხი, რისი დასმაც ჩვენ გვინდა, არის შავი ზღვის გავლით ფიზიკური კავშირებისა და სატრანსპორტო-ლოჯისტიკური სერვისების განვითარება. ძალიან მნიშვნელოვანია ჩვენთვის, რომ უკეთ გამოვიყენოთ თავისუფალი ვაჭრობის შეთანხმება, გვქონდეს ფიზიკური წვდომა უფრო რეგულარულ ევროპულ პორტებზე. დღეს გვაქვს გარკვეული საბორნე მიმოსვლა, მაგრამ არ არის იმდენად რეგულარული და არ ასახავს იმ პოტენციალს, რაც ჩვენ გვაქვს. მეორე მიმართულება არის თავისუფალი ვაჭრობის გაძლიერება ევროპასთან. დღესდღეობით ევროპა უკვე არის ჩვენი მნიშვნელოვანი სავაჭრო პარტნიორი. პანდემიურ 2020 წელსაც კი 23-24 პროცენტის ფარგლებში იყო ექსპორტიც და იმპორტიც ევროკავშირსა და საქართველოს შორის, მაგრამ არის მთელი რიგი სასაქონლო ჯგუფები, რომელიც გვინდა, რომ უფრო გამარტივებული წესით შედიოდეს ამ ბაზარზე. გვინდა, რომ ერთად გავაკეთოთ იდენტიფიცირება ასეთი სასაქონლო ჯგუფების და ასევე, გვინდა ვთხოვოთ, რა თქმა უნდა, ევროკავშირის შესაბამის სტრუქტურებს, დაგვეხმარონ, ისევე როგორც ყოველთვის გვეხმარებიან, თუნდაც მცირე და საშუალო ბიზნესისთვის ახალი რეგულაციების, ხარისხის სტანდარტების ლაბორატორიული ტესტების დანერგვაში, რადგან ლაბორატორიული ინფრასტრუქტურა ჩვენ ჯერჯერობით არ გვაქვს განვითარებული და ეს დამატებით ხარჯებს იწვევს, როდესაც საზღვარგარეთ უწევთ ტესტების გაგზავნა და ამ მიმართულებით ვიმსჯელებთ“, – განაცხადა ნათია თურნავამ.
შავი ზღვის გამავალი მარშრუტები და ჩვენი უკეთესი კავშირები ევროპულ პორტებთან, ევროკავშირის ბაზრის სრული ათვისება და ახალი პროდუქციის ჯგუფების შერჩევა, - ეს გზავნილები ჩაიტანეს ქართველმა დელეგატებმა ბრიუსელში.
დახმარებების პაკეტი, ფინანსური მხარდაჭერა და ინვესტიციები - ეს ძირითადი მიმართულებებია, რა მხრივაც საქართველო ევროკავშირისგან ქართული დელეგაციის სტუმრობის შემდეგ ელოდება. ირაკლი ღარიბაშვილისა და სამთავრობო დელეგაციის ვიზიტი ბრიუსელში გუშინ დაიწყო. საქართველოს პრემიერ-მინისტრი ირაკლი ღარიბაშვილი საქართველო-ევროკავშირის ასოცირების საბჭოს მეექვსე სხდომაში მონაწილეობს. საქართველოს დელეგაციაში, რომელსაც პრემიერ-მინისტრი ირაკლი ღარიბაშვილი ხელმძღვანელობს, ვიცე-პრემიერი, საგარეო საქმეთა მინისტრი დავით ზალკალიანი, ეკონომიკისა და მდგრადი განვითარების მინისტრი ნათია თურნავა და იუსტიციის მინისტრი გოჩა ლორთქიფანიძე იმყოფებიან.
ბელა გელაშვილი
ავტორი