აზერბაიჯანის პრეზიდენტმა, ილჰამ ალიევმა ბაქო-თბილისი-ყარსის (BTK) სარკინიგზო პროექტის განხორციელებასთან დაკავშირებული ღონისძიებების შესახებ 2007 წლის 21 თებერვლის ბრძანება შეცვალა. Report.ge-ს ცნობით, ამის შესახებ აზერბაიჯანული მედია წერს.
ანგარიშის თანახმად, BTK-ის მარაბდა-ახალქალაქის მონაკვეთის აღდგენისა და რეკონსტრუქციის, ახალქალაქის მონაკვეთის თურქეთის საზღვრამდე მშენებლობის დასაფინანსებლად და სხვა ორგანიზაციულ ღონისძიებებზე ოპერატიული კონტროლის განხორციელების მიზნით შექმნილი სახელმწიფო კომისიის თავმჯდომარეობა აზერბაიჯანის რკინიგზის(AZD) თავმჯდომარიდან აზერბაიჯანის ციფრული განვითარებისა და ტრანსპორტის მინისტრზე გადავიდა.
AZD-ის თავმჯდომარე კომისიის წევრად დარჩება.
ბაქო-თბილისი-ყარსი (BTK) ახალი სარკინიგზო მარშრუტია, რომელიც საქართველოზე გავლით, ევროპასა და აზიას ერთმანეთთან აკავშირებს. მისი მშენებლობა 2008 წელს დაიწყო და 2017 წელს დასრულდა. სარკინიგზო მაგისტრალი სატესტო რეჟიმში 2017 წლიდან მოქმედებს. სატვირთო ტრანზიტისთვის სარკინიგზო მარშრუტი აქტიურია 2018 წლიდან.
ცნობისთვის, ეკონომიკის მინისტრის შეფასებით, ბაქო-თბილისი-ყარსის სარკინიგზო მაგისტრალი ჩინეთ-ევროპას შორის უმოკლესი გზაა, რაც აიაფებს ტვირთს და საქართველოს კონკურენტუნარიანობას ზრდის ამ დერეფანში.
