ქართულმა დელეგაციამ მონაწილეობა მიიღო სუამ-ის საპარლამენტო ასამბლეის ბიუროს მე -15 შეხვედრაში, რომელიც პანდემიის გამო ვიდეოკონფერენციის ფორმატში გაიმართა.
საქართველოს პარლამენტის პრესსამსახურის ინფორმაციით, შეხვედრას ესწრებოდნენ პარლამენტში საქართველოს დელეგაციის ხელმძღვანელი გიორგი ხელაშვილი, ვიცე-სპიკერი კახა კუჭავა, დეპუტატები კახა კახიშვილი, დავით მათიკაშვილი, ირაკლი ზარქუა და ლევან მგალობლიშვილი.
განხილვის მთავარი თემა იყო მთიანი ყარაბაღის კონფლიქტი.
მონაწილეებმა განიხილეს სუამ-ის ორგანიზაციის ფარგლებში ეკონომიკური თანამშრომლობის შემდგომი გაღრმავება და ერთობლივი პროექტების შემუშავება.
აღინიშნა, რომ თავისუფალი ვაჭრობა და სუამ-ის ქვეყნებს შორის სატრანსპორტო დერეფნის პოტენციალი ეფექტურად გამოიყენება. საუბრისას ასევე განიხილეს ბალტიის ქვეყნებთან თანამშრომლობის გაღრმავება კონკრეტულ სფეროებში.
სუამ-ის საქართველოს დელეგაციის ხელმძღვანელმა, გიორგი ხელაშვილმა, მონაწილეებს გააცნო საქართველოს ოკუპირებულ ტერიტორიებზე შექმნილი ვითარების შესახებ. ის ასევე შეეხო ცხინვალის რეგიონში საქართველოს მოქალაქე ზაზა გახელაძის რუსეთის უკანონო ოკუპანტური რეჟიმის მიერ დაკავებასაც.
2021 წელს სუამ-ის თავმჯდომარე საქართველო გახდა.
შეგახსენებთ, სუამ-ის ქვეყნებს შორის ვაჭრობა 2019 წლის ბოლოს კიდევ უფრო გამარტივდა და მის წევრ ქვეყნების შორის ერთიანი ეკონომიკური ზონა შეიქმნა.
ცნობისთვის, სუამ-ის საკონსულტაციო ფორუმი 1997 წლის 10 ოქტომბერს, სტრასბურგში, ევროპის საბჭოს სამიტის მსვლელობისას, ოთხი ქვეყნის (საქართველო, უკრაინა, აზერბაიჯანი და მოლდოვა) მონაწილეობით დაფუძნდა.
2006 წლის 22-23 მაისს, კიევში გამართულ სუამ-ის მორიგ სამიტზე, სუამ-ის გაერთიანების ბაზაზე შეიქმნა ახალი ორგანიზაცია - დემოკრატიისა და ეკონომიკური განვითარების ორგანიზაცია - სუამ-ი. ახალი ორგანიზაციის შექმნა ოფიციალურად გაფორმდა სუამ-ის ქვეყნების სახელმწიფო მეთაურთა მიერ კიევის შესაბამისი დეკლარაციის, ორგანიზაციის წესდებისა და სხვა დამფუძნებელი დოკუმენტების ხელმოწერით.
ბელა გელაშვილი
ავტორი