ქვეყნის საბანკო სისტემაში არსებული უმოქმედო სესხების წილი წელს 3.9 პროცენტული პუნქტით გაიზარდა და ამჟამად 8.4%-ს შეადგენს. ამის შესახებ დღეს ეროვნული ბანკის პრეზიდენტმა, კობა გვენეტაძემ, მონეტარული პოლიტიკის კომიტეტის (მპკ-ის) სხდომის შემდეგ განაცხადა. საქართველოს პირველი ბანკირის განმარტებით, 2021 წლის პირველ ნახევარში უმოქმედო სესხების მაჩვენებელი, სავარაუდოდ, 10%-მდეც გაიზრდება, თუმცა ეროვნული ბანკის პრეზიდენტი აღნიშნავს, რომ უმოქმედო სესხების ზრდისთვის საბანკო სისტემა მზად არის, რადგანაც ბანკებმა 2020 წლის გაზაფხულზე სესხების შესაძლო დანაკარგებისთვის წინასწარ 1 მილიარდი ლარი დაარეზერვეს.
“მოგეხსენებათ, ბანკებს დანაკარგების შეფასება 2020 წელსვე მოვთხოვეთ და მათ შესაძლო დანაკარები უკვე გათვალისწინებული აქვთ. მოსალოდნელია, რომ 2021 წლის პირველ ნახევარში უმოქმედო სესხების წილი საკრედიტო პორტფელის 10%-ს მიაღწევს", - აცხადებს ეროვნული ბანკის პრეზიდენტი და დასძენს, რომ საქართველოში მოქმედ 15 კომერციულ ბანკს ქვეყნის ეკონომიკაზე 39 მილიარდი ლარის სესხები აქვთ გაცემული, ამ საკრედიტო პორტფელში უმოქმედო სესხების 8.4%-იანი წილი ნიშნავს, რომ 3.27 მილიარდი ლარის მოცულობის სესხები ამჟამად უმოქმედო სესხებს წარმოადენს.
ეროვნული ბანკის პროგნოზით, წელს საქართველოში დაკრედიტების მოცულობა 7.5%-ით გაიზრდება.
ცნობისთვის, 2021 წლის პირველი იანვრის მდგომარეობით, საქართველოს საბანკო სექტორი 15 კომერციული ბანკითაა წარმოდგენილი; მათ შორის 14 - საწესდებო კაპიტალში უცხოური კაპიტალის მონაწილეობით.
ბელა გელაშვილი
ავტორი