ნიკა მელიამ პრაქტიკულად ხელთათმანი ესროლა სამართალს, ეს მიუღებელია, - ამის შესახებ პარლამენტის ჯანდაცვის კომიტეტის თავმჯდომარემ დიმიტრი ხუნდაძემ განაცხადა.
ხუნდაძის თქმით, ოპოზიცია დესტრუქციულ რეჟიმში რჩება და ხელს უწყობს ნიკა მელიას სამართლებრივი სახელმწიფოს ფუნდამენტის დაზიანებაში.
"ეს ფანჩატურული დროებითი გაუგებარი ერთობა არავითარ საერთო ღირებულებებს არ ეფუძნება. თუმცა, მათ აქვთ საერთო, რომ დესტრუქციის გზით უნდათ ხელისუფლებაში მოსვლა, ეს წარმოუდგენელია. ქვეყანაში არჩევნები ჩატარდა თავისუფალ გარემოში, როგორც აღიარეს საერთაშორისო პარტნიორებმა. საზოგადოების გადაწყვეტილებაა, რომ მოცემული კონფიგურაციით იყოს წარმოდგენილი, როგორც ოპოზიცია, ასევე პოზიცია პარლამენტში და მათი დაკვეთა უნდა აღსრულდეს. თუმცა, ისინი რჩებიან დესტრუქციულ რეჟიმში და ხელს უწყობენ ნიკა მელიას, დააზიანოს სამართლებრივი სახელმწიფოს ფუნდამენტი", - განაცხადა დიმიტრი ხუნდაძემ.
საქართველოს გენერალურმა პროკურატურამ თბილისის საქალაქო სასამართლოს "ერთიანი ნაციონალური მოძრაობის" თავმჯდომარის, ნიკა მელიას მიმართ შეფარდებული აღკვეთის ღონისძიების შეცვლის შუამდგომლობით გუშინ მიმართა.
როგორც საქმის პროკურორმა მიხეილ სადრაძემ განაცხადა, პროკურატურა მელიას მიმართ უფრო მკაცრი აღკვეთის ღონისძიების - პატიმრობის გამოყენებას მოითხოვს, ვინაიდან ეს პროპორციული ღონისძიებაა.
ცნობისთვის, საქართველოს პარლამენტმა ნიკა მელიას იმუნიტეტი მოუხსნა და გენერალური პროკურორის შუამდგომლობას, რომ "ნაციონალური მოძრაობის" თავმჯდომარის მიმართ აღკვეთის ღონისძიებად პატიმრობის გამოყენებაზე სასამართლოს მიმართოს, მხარი დაუჭირა.
პლენარულ სხდომამდე საპროცედურო საკითხთა და იურიდიულ საკითხთა კომიტეტების ერთობლივ სხდომაზე, სადაც გენერალური პროკურორის შუამდგომლობა და არგუმენტები კომიტეტის წევრებს პროკურორმა ამირან გულუაშვილმა გააცნო, საგამოძიებო უწყებისათვის თანხმობის მიცემას უმრავლესობის წარმომადგენლებმა ერთხმად დაუჭირეს მხარი. ხმა წინააღმდეგ „მოქალაქეების“ ერთ-ერთმა ლიდერმა, ლევან იოსელიანმა მისცა.
შეგახსენებთ, რომ 2019 წლის 20-21 ივნისის მოვლენებთან დაკავშირებით, ნიკა მელიას ბრალად ედება საზოგადოებრივი უშიშროების და წესრიგის წინააღმდეგ მიმართული მძიმე კატეგორიის, ძალადობრივი დანაშაულის ჩადენა.
თბილისის საქალაქო სასამართლომ ნიკა მელიას 2019 წლის 27 ივნისს, აღკვეთის ღონისძიების სახით 30 000-ლარიანი გირაო შეუფარდა.
პროკურატურის განცხადებით, ,,ნაციონალური მოძრაობის" თავმჯდომარეს გირაოს პირობების შეუსრულებლობის გამო მანამდე გამოყენებული აღკვეთის ღონისძიება გაუმკაცრდა და გირაოს ოდენობა 40 000 ლარით გაიზარდა.
ნიკა მელია პროკურატურაში დაიბარეს თუმცა არ გამოცხადდა. მას გირაოს გადასახდელად დამატებით 1 კვირის ვადა მიეცა, რაც უკვე ამოიწურა.
