ამერიკის სახელმწიფო მდივანი ენტონი ბლინკენი ისლანდიის დედაქალაქში რუსეთის საგარეო საქმეთა მინისტრს სერგეი ლავროვს შეხვდა. პირისპირ შეხვედრა რეიკიავიკში ღამით, არქტიკული საბჭოს მინისტრების სამიტის დასრულების შემდეგ გაიმართა. ეს აშშ-ის ახალი ადმინისტრაციის პირობებში ორი სახელმწიფოს პირველი დიპლომატის პირველი შეხვედრა იყო. ინფორმაციას ABC News ავრცელებს.
საუბრისას მხარეებმა თანამშრომლობის გზები განიხილეს. მსჯელობის ერთ-ერთი მთავარი საგანი ასევე ორი სახელმწიფოს ლიდერის სავარაუდო შეხვედრა იყო. ვაშინგტონმა და მოსკოვმა ახლო მომავალში ჯო ბაიდენისა და ვლადიმერ პუტინის შეხვედრა უნდა მოამზადონ.
აშშ-სა და რუსეთს შორის ურთიერთობები ვაშინგტონის მიერ მოსკოვის მხრიდან კიბერშეტევებისა და აშშ-ის არჩევნებში ჩარევის შესახებ განცხადებების გავრცელების, ასევე უკრაინის საზღვარზე რუსული სამხედრო ტექნიკის მობილიზებისა და ნავალნის საქმესთან დაკავშირებით გამწვავდა. აშშ-მა რუსეთის წინააღმდეგ სანქციები დააწესა, რასაც რუსეთმაც სანქციებით უპასუხა.
მედეა ცხოვრებაძე
ავტორი