კომპანია Moderna–ს გენერალურმა დირექტორმა, სტეფან ბანსელმა, რომელიც კორონავირუსის საწინააღმდეგო ვაქცინას აწარმოებს, განაცხადა, რომ COVID-პანდემია მომავალ წელს დასრულდება. ინფორმაციას ამის შესახებ Yahoo News ავრცელებს.
"თუ ბოლო 6 თვის მანძილზე კორონავირუსის საწინააღმდეგო ვაქცინების წარმოების შესაძლებლობების გაფართოებას შეხედავთ, მომავალი წლის შუა რიცხვებში უნდა იყოს საკმარისი დოზები, რათა დედამიწაზე ყველა იყოს აცრილი", - განაცხადა ბანსელმა.
მისი აზრით, დღეიდან ერთი წლის თავზე მსოფლიოში ცხოვრება "ნორმალურს" დაუბრუნდება.
ამავე დროს, მან აღნიშნა, რომ ის ადამიანები, ვინც ვაქცინაციაზე უარს იტყვიან, COVID-19–ით აუცილებლად დაავადდებიან და მათ ბუნებრივი იმუნიტეტი განუვითარდებათ.
”თქვენ შეგიძლიათ აიცრათ და ზამთარი მშვიდად გაატაროთ. ან ამას არ იზამთ და ჩნდება რისკი, რომ ავად გახდებით და საავადმყოფოშიც კი მოხვდებით", - დასძინა ბანსელმა.
