აშშ-ში დააკავეს ქალი, რომელმაც აშშ-ის წარმომადგენელთა პალატის სპიკერის ნენსი პელოსის ნოუთბუქი მოიპარა და მის გადაცემას რუსეთის სპეცსამსახურებისთვის აპირებდა. ინფორმაციას ამის შესახებ აშშ-ის იუსტიციის დეპარტამენტზე დაყრდნობით გამოცემა The Guardian ავრცელებს.
აშშ-ის იუსტიციის დეპარტამენტის ცნობით, რაილი ჯუნ უილიამსი სამართალდამცავებმა 18 იანვარს დააკავეს. ქალს კაპიტოლიუმში უკანონო შესვლასა და მის ტერიტორიაზე უკანონო ქმედებებში ადანაშაულებენ.
მანამდე ცნობილი გახდა, რომ არეულობებისა და კაპიტოლიუმის შტურმის დროს, აშშ-ის წარმომადგენელთა პალატის სპიკერის ნენსი პელოსის ლეპტოპი მოიპარეს. გამოძიების ფედერალური ბიუროს ცნობით, ქალი კომპიუტერის მიყიდვას რუსეთის საგარეო სადაზვერვო სამსახურისთვის აპირებდა.
პელოსის თანაშემწემ განაცხადა, რომ კომპიუტერი მხოლოდ პრეზენტაციების დემონსტრირებისთვის გამოიყენებოდა.
შეგახსენებთ, 6 იანვარს აშშ-ის მოქმედი პრეზიდენტის, დონალდ ტრამპის მხარდამჭერები კაპიტოლიუმის შენობაში შეიჭრნენ, სადაც კონგრესის გაერთიანებულ სხდომაზე საპრეზიდენტო არჩევნების შედეგების დამტკიცება მიმდინარეობდა. დემონსტრანტებმა ჩაშალეს სხდომა და დაარბიეს კაპიტოლიუმის შენობა. დაპირისპირებას 5 ადამიანი ემსხვერპლა და ათობით დაშავდა.
