კომპანია SpaceX-ისა და Tesla-ს დამფუძნებელმა, მილიარდერმა ილონ მასკმა, იუმორისტული სატელევიზიო გადაცემის, Saturday Night Live-ის ეთერში განაცხადა, რომ ასპერგერის სინდრომი აქვს. ამის შესახებ გამოცემა Forbes წერს.
ილონ მასკი გასართობი შოუს მოწვეული წამყვანი იყო. მან გადაცემის ჩაწერისას განაცხადა, რომ იგი Saturday Night Live-ის პირველი წამყვანია, რომელსაც ასპერგერის სინდრომი აქვს.
შეესაბამება თუ არა მისი განაცხადი სიმართლეს ამჟამად უცნობია. შესაძლებელია, გადაცემის ფორმატიდან გამომდინარე, მისი განაცხადი უბრალოდ ხუმრობა ყოფილიყო.
ასპერგერის სინდრომი აუტიზმის სპექტრის აშლილობის ერთ-ერთი ფორმაა. ასპერგერის სინდრომის მქონე ადამიანებს შეიძლება ჰქონდეთ მაღალი ინტელექტი და საშუალოზე კარგი ვერბალური (მეტყველებითი) უნარები, სწორედ ეს განასხვავებს ამ მდგომარეობას სპექტრის სხვა ფორმებისგან. ასპერგერის სინდრომი ითვლება აუტიზმის მაღალფუნქციურ ფორმად.