ჯანდაცვის მსოფლიო ორგანიზაციის სპეციალისტთა საერთაშორისო ჯგუფის წარმომადგენელმა პიტერ დასზაკმა განაცხადა, რომ კორონავირუსის ღამურების მეშვეობით გავრცელების ვერსია სიმართლეს ყველაზე მეტად შეესაბამება. ამის შესახებ გამოცემა The New York Times წერს.
ჯანმო-ს ცხოველთა დაავადებების სპეციალისტი აღნიშნავს, რომ COVID-19, სავარაუდოდ, ჩინეთის სამხრეთით ან სამხრეთ-აღმოსავლეთ აზიაში წარმოიშვა.
"ვფიქრობ, რომ ვირუსი სამხრეთ-აღმოსავლეთ აზიაში ან სამხრეთ ჩინეთში ღამურებისგან წარმოიშვა, შემდეგ კი გარეული ცხოველების ფერმაში გავრცელდა", - ციტირებს New York Times ჯანმო-ს ექსპერტის განცხადებას.
დასზაკმა განმარტა, რომ COVID-19-ის გარეული ცხოველებისგან შუალედური კავშირით გადაცემის ვერსიამ ჩინელი მკვლევარებისა და ჯანმო-ს მისიის ექსპერტების ყველაზე დიდი მხარდაჭერა მოიპოვა.
შეგახსენებთ, ცნობილი გახდა, რომ ჩინეთის ხელისუფლებამ ჯანდაცვის მსოფლიო ორგანიზაციას კორონავირუსით ინფიცირებული ადრეული შემთხვევებისა და პირველი ინფიცირებულების მონაცემების მიწოდებაზე უარი განუცხადა.
ჩინეთში, ქალაქ უჰანში, ჯანმო-ს საერთაშორისო ექსპერტთა ჯგუფი 14 იანვარს ჩავიდა. მათ ზღვის პროდუქტების ბაზრობა და სამედიცინო დაწესებულებები მოინახულეს და აღებული ნიმუშების შესასწავლად ჟენევაში დაბრუნდნენ.
