კანადის პროვინცია ონტარიოში შეზღუდვები გამკაცრდა. ამის მიზეზი კორონავირუსის ახალი შტამის, "ომიკრონის" გავრცელება გახდა. Report.ge-ს ცნობით, ინფორმაციას Reuters ავრცელებს.
17 იანვრამდე ყველა საჯარო და კერძო სკოლა დისტანციურ სწავლებაზე გადადის.
სავაჭრო ცენტრებს მუშაობის უფლება მხოლოდ მყიდველების 50%-ით შემცირებით აქვთ.
ქორწილების, პანაშვიდების, საეკლესიო მსახურების და სხვა ცერემონიების ჩატარება ადგილზე 50%-იანი ლიმიტით იქნება შესაძლებელი. ღია ცის ქვეშ, იგივე ღონისძიებების განხორციელებისას, 2-მეტრიანი სოციალური დისტანციის დაცვა იქნება საჭირო.
ასეთი შეზღუდვები ძალაში, სულ მცირე, 21 დღის განმავლობაში იქნება.
ამასთან, დაიხურა შიდა რესტორნები და ბარები, საკონცერტო ადგილები, თეატრები და კინოთეატრები; სპორტული და გასართობი ობიექტები, მათ შორის სპორტული დარბაზები.
კომპანიებმა და ორგანიზაციებმა თანამშრომლები მუშაობის დისტანციურ რეჟიმზე უნდა გადაიყვანონ.
ორშაბათის მდგომარეობით ონტარიოში კორონავირუსით საავადმყოფოში 1 232 ადამიანი გადაიყვანეს. დღე-ღამეში COVID-19-ის 13 578 ახალი შემთხვევა გამოვლინდა.