NATO-ს ალიანსი კორონავირუსის ინფექციის მეორე ტალღისთვის ემზადება. ამის შესახებ ინფორმაციას გერმანული გამოცემა Spiegel სანდო წყაროზე დაყრდნობით ავრცელებს.
ანგარიშის თანახმად, ნატოს ელჩებმა გასულ კვირას გენერალურ მდივანთან იენს სტოლტენბერგთან გამართულ შეხვედრაზე გადაწყვიტეს, შეემუშავებინათ საოპერაციო გეგმა, რომელსაც ივნისში NATO-ს თავდაცვის მინისტრთა შეხვედრაზე დაამტკიცებენ.
სტოლტენბერგმა ფარული შეხვედრის დროს განაცხადა, რომ კორონავირუსის მეორე ტალღა ალიანსის სანდოობისა და ერთიანობის "ლაკმუსის ტესტი" იქნება.
სააგენტო აღნიშნავს, რომ გენერალურმა მდივანმა NATO-ს პირადი დამცავი აღჭურვილობისა და მედიკამენტების საერთო შესყიდვა შესთავაზა.
ელჩები ასევე შეთანხმდნენ, რომ პანდემიასთან რეაგირების უფრო გრძელვადიან გეგმას შეიმუშავებენ.
ამ ინიციატივებმა ალიანსის შიგნით იმედგაცრუება გამოიწვია, ვინაიდან NATO არ იყო საკმარისად მომზადებული პანდემიისთვის.
