აშშ-ის ყოფილმა პრეზიდენტმა, დონალდ ტრამპმა გააუქმა პრესკონფერენცია, რომელიც მისი მხარდამჭერების მიერ კაპიტოლიუმზე შტურმის წლისთავზე უნდა გამართულიყო. Report.ge-ს ცნობით, ინფორმაციას Reuters ავრცელებს.
ტრამპმა "მიკერძოებულობასა და არაკეთილსინდისიერებაში" დაადანაშაულა აშშ-ის წარმომადგენელთა პალატის სპეციალური კომიტეტი, რომელიც 2021 წლის 6 იანვრის მოვლენებს იძიებს.
”მე ვაუქმებ პრესკონფერენციას, რომელიც 6 იანვარს უნდა გამართულიყო", -განაცხადა ექს-პრეზიდენტმა.
მან განმარტა, რომ კაპიტოლიუმზე შტურმის წლისთავთან დაკავშირებულ საკითხებზე 15 იანვარს არიზონაში დაგეგმილ მიტინგზე ისაუბრებს.
ცნობისთვის, 6 იანვარს ექსპრეზიდენტ დონალდ ტრამპის მომხრეებმა, რომლებიც პრეზიდენტ ჯო ბაიდენის გამარჯვებას აპროტესტებდნენ, კაპიტოლიუმის შტურმი და საპრეზიდენტო არჩევნების შედეგების კენჭისყრის ჩაშლა სცადეს. დაპირისპირებას 5 ადამიანი, მათ შორის პოლიციელი ემსხვერპლა.
აშშ-ის კონგრესის წარმომადგენელთა პალატამ, 252 ხმით 175-ის წინააღმდეგ, მხარი დაუჭირა 6 იანვარს კაპიტოლიუმზე მომხდარი შტურმისა და სახელმწიფო გადატრიალების მცდელობის საგამოძიებო კომისიის შექმნას.
