თურქეთის პრეზიდენტის ადმინისტრაციამ ვაშინგტონი გააკრიტიკა მას შემდეგ, რაც აშშ-მა ღაზას სექტორის დაბომბვა თავდაცვად შეაფასა. განცხადება რეჯეფ თაიფ ერდოღანის ადმინისტრაციის მედიასთან კომუნიკაციის დეპარტამენტის დირექტორმა, ფაჰრეთინ ალთუნმა "ტვიტერში" გაავრცელა.
„მშვიდობიანი მოქალაქეების ხოცვა-ჟლეტა. პალესტინელების იძულება დატოვონ საკუთარი სახლები და მათი მიწების ოკუპაცია. მეჩეთებზე თავდასხმა. უდანაშაულო ბავშვების მკვლელობა, როდიდან აფასებენ ამ დანაშაულებებს თავდაცვად? აშშ-ს აქვს რაიმე რეაქცია ამ ხოცვა-ჟლეტაზე და ტერორისტულ აქტებზე?“ – წერს ალთუნი.
Massacring civilians
— Fahrettin Altun (@fahrettinaltun) May 11, 2021
Forcing Palestinians to leave their homes and occupying their lands
Attacking mosques
Murdering innocent children. Since when are all those atrocities considered as self defense?
Does the US have not any reaction to these massacres and terrorist acts? https://t.co/3wwNRkZYSe
ისრაელმა ღაზას სექტორზე სარაკეტო იერიში დღეს დილით განახორციელა. შეტევის შედეგად ცხრასართულიანი შენობა დაინგრა და 35 ადამიანი დაიღუპა. ინფორმაციას Reuters ავრცელებს. ისრაელმა ღაზას სექტორზე შეტევა მას შემდეგ დაიწყო, რაც „ჰამასმა“ თელ-ავივისა და ცენტრალური ისრაელის ქალაქების მიმართულებით ათასზე მეტი რაკეტა გაუშვა.
ისრაელის მედიის ინფორმაციით, სარაკეტო თავდასხმა ქალაქ ლოდზეც განხორციელდა. დაღუპულია ორი ადამიანი, მათ შორის ერთი შვიდი წლის გოგონაა. დაშავებულები საავადმყოფოში გადაიყვანეს. მათი მდგომარეობა მძიმეა.
ისრაელის არმიის გენშტაბის ინფორმაციით, სამხედრო ოპერაციები მანამდე გაგრძელდება, ვიდრე ღაზას სექტორში რადიკალების ყველა გვირაბი არ იქნება განადგურებული.
პალესტინის ჯგუფებმა 11 მაისს ისრაელის ქალაქ აშდოდის დაბომბვა დღის 13:00 საათზე დაიწყეს.
სარაკეტო თავდასხმის შედეგად, თელ-ავივის მახლობლად, ქალაქ რიშონ ლეციონში ერთი ადამიანი დაიღუპა. დაშავებულია 8 ადამიანი, მათ შორის 5 წლის ბავშვი.
ისრაელის არმიამ დანაყოფების გასაძლიერებლად 5000 რეზერვისტი გამოიძახა.
თელ-ავივში, სარაკეტო იერიშებისგან თავდასაცავად, მოქალაქეებისთვის თავშესაფრები გახსნეს. თუმცა, ამ ეტაპზე თელ-ავივის მიმართულებით სარაკეტო დარტყმები არ განხორციელებულა.
11 მაისის ღამით დაჯგუფება „ჰამასმა“ ისრაელის მიმართულებით დაახლოებით 630 რაკეტა გაუშვა. აქედან 150 ღაზას სექტორის შიგნითვე აფეთქდა. ისრაელის სარაკეტო თავდაცვის სისტემამ დაახლოებით 200 მათგანის შეკავება შეძლო.
