უკრაინის პრემიერ-მინისტრი ალექსეი გონჩარუკი თანამდებობას ტოვებს. მან განცხადება უკვე დაწერა და პრეზიდენტ ვლადიმერ ზელენსკის გადასცა. ამის შესახებ თავად გონჩარუკმა სოციალურ ქსელ "Facebook-ში" დაწერა.
„ამ თანამდებობაზე მოვედი, რათა პრეზიდენტის პროგრამა შემესრულებინა. ის ჩემთვის წესიერების მაგალითია. იმისთვის, რომ გაქრეს ნებისმიერი ეჭვი ჩვენი პრეზიდენტის მიმართ პატივისცემასა და ნდობასთან დაკავშირებით, დავწერე განცხადება თანამდებობის დატოვებასთან დაკავშირებით და გადავეცი პრეზიდენტს“, – განაცხადა უკრაინის პრემიერ-მინისტრმა.
უკრაინის პრეზიდენტის ოფისში დაადასტურეს, რომ ზელენსკიმ გონჩარუკისგან გადადგომის შესახებ განცხადება მიიღო.
"სახელმწიფოს მეთაური აღნიშნულ განცხადებას განიხილავს. განხილვის შედეგების შესახებ უკრაინის პრეზიდენტის ოფისი ცალკე ინფორმაციას გაავრცელებს", - ნათქვამია ზელენსკის ოფისის განცხადებაში, რომელიც Telegram-არხზე გავრცელდა.
ალექსეი გონჩარუკი უკრაინის პრემიერად 2019 წლის 29 აგვისტოს დაინიშნა.