გიორგი შაქარაშვილის გარდაცვალების საქმესთან დაკავშირებით, მცხეთის საქალაქო სასამართლოში, ერთ-ერთი მთავარი მოწმე, ფოტოგრაფი დაიკითხა.
იაკობ ბრეგვაძის თქმით, სასამართლო პროცესზე ძალიან ბევრი კითხვა დაისვა და ყველა მათგანს უპასუხა.
"ბევრი შეკითხვა იყო ძალიან და ყველა შეკითხვას პასუხი გავეცი. გამეორებული შეკითხვებიც იყო ძალიან ბევრი, მაგასაც ვუპასუხე“, -განაცხადა ბრეგვაძემ.
ცნობისთვის, დღეს მცხეთის საქალაქო სასამართლოში გიორგი შაქარაშვილის გარდაცვალების საქმესთან დაკავშირებით არასრულწლოვნების სასამართლო პროცესი მიმდინარეობს.
შეგახსენებთ, 19 ივნისს, დაახლოებით 11:00 საათზე გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები. 4-დღიანი უწყვეტი საძიებო სამუშაოების შედეგად მყვინთავებმა ფეხბურთელ გიორგი შაქარაშვილის ცხედარი წყალში იპოვეს.
შინაგან საქმეთა სამინისტრომ ფეხბურთელ გიორგი შაქარაშვილის საქმეზე 26 ივნისს 17 ადამიანი დააკავა.
28 ივნისს გიორგი შაქარაშვილის საქმეზე ბრალდებულ 17 პირს აღკვეთის სახით პატიმრობა შეეფარდა.
10 ივლისს პროკურატურამ გაავრცელა ინფორმაცია, რომლის თანახმადაც, გიორგი შაქარაშვილის სიკვდილის მიზეზია ასფიქსია წყალში დახრჩობით.ამასთან, ექსპერტიზის დასკვნით გაირკვა, რომ მას გარდაცვალებამდე მკვრივი-ბლაგვი საგნით მიყენებული დაზიანებები აქვს.
გენპროკურატურამ შაქარაშვილის საქმეზე 11 ბრალდებულის საქმე ცალკე წარმოებად გამოყო. გიორგი შაქარაშვილის საქმეზე ხუთ დაკავებულს ბრალი დაუმძიმდა.
საქართველოს გენერალურმა პროკურატურამ გიორგი შაქარაშვილის დამამძიმებელ გარემოებებში განზრახ მკვლელობის ბრალდებით სისხლის სამართლებრივი დევნა ხუთი პირის მიმართ დაიწყო.
სალომე კაპანაძე
ავტორი