მედიასაშუალებების 17 წარმომადგენელს დაზარალებულის სტატუსი მიენიჭა. თბილისის მთავარ სამმართველოში ჟურნალისტების, ოპერატორებისა და ფოტოგრაფების გამოკითხვა ამ დრომდე მიმდინარეობს. სამართალდამცავების კითხვები შეეხება იმას თუ რა ვითარებაში მოხდა ჟურნალისტებზე თავდასხმა, ძალადობა და რა პირობებში დაუზიანეს მათ ტექნიკა.
დაკავებულია 3 პირი სისხლის სამართლის კოდექსის ორი მუხლით, ხოლო ადმინისტრაციული წესით დაკავებულ პირთა რაოდენობა 8-ს შეადგენს. დანაშაულში მონაწილე სხვა პირების დადგენა-დაკავების მიზნით კი, შინაგან საქმეთა სამინისტრო საგამოძიებო ღონისძიებებს ახორციელებს.
შეგახსენებთ, 5 ივლისს, თბილისში, რუსთაველის გამზირზე, "თბილისი პრაიდის" კვირეულის მოწინააღმდეგე რადიკალური ჯგუფები ჟურნალისტებს თავს დაესხნენ.
შსს-ს ინფორმაციით, ძალადობის მსხვერპლი 55 ადამიანი გახდა, მათ შორის 53 მედიის წარმომადგენელია.
