პარტიაში მოსული ვარ ჩემს მეგობრებთან, „გირჩის“ გულშემატკივარი ვარ და მინდა, გავარკვიო, რა სიტუაციაა, – ამის შესახებ „გირჩის“ ერთ-ერთმა დამფუძნებელმა, პავლე კუბლაშვილმა ჟურნალისტებს განუცხადა.
კუბლაშვილის თქმით, პარტიის შიდა პოლიტიკურ საუბრის უფლებამოსილება არ აქვს, თუმცა ამბობს, რომ გაუგებრობა ყველა პარტიაში შეიძლება მოხდეს.
„პარტიაში მოსული ვარ ჩემს მეგობრებთან, რადგან მინდა, გავერკვე, რა ხდება. გაუგებრობები ყოველთვის შეიძლება იყოს ყველა პარტიასა და სამეგობროში. „გირჩის“ გულშემატკივარი ვარ და მინდა, გავარკვიო, რა სიტუაციაა. სამწუხაროდ, ზურას ნახვა ვერ მოვახერხე. ვახტანგ მეგრელიშვილს ვესაუბრე, იაგო ხვიჩია არ მინახავს. რაც თქვენ იცით, ის ვიცი მეც. გულწრფელად გეტყვით, რომც ვიცოდე, არ ვარ უფლებამოსილი პირი, რომ „გირჩის“ საკითხებზე ვისაუბრო, მათ შორის არც შიდა პოლიტიკურ საკითხებზე. 2016 წლის ნოემბრის შემდეგ რაიმე შეხება არ მაქვს. ქვეყანაში გაცილებით მნიშვნელოვანი საკითხებია, ვიდრე „გირჩში“ მიმდინარე პროცესები. მეგობრებს ვგულშემატკივრობ და მგონი, ეს არავის გაუკვირდება. ეს გულშემატკივრობა გარედან მხარდაჭერის თვალსაზრისით გამოიხატებოდა სულ ბოლო არჩევნების განმავლობაშიც კი. ეს შემოიფარგლებოდა რიგითი მხარდაჭერით საარჩევნო კამპანიისას. ძალიან არ მინდა, ჩემი მეგობრების ნაცვლად ვისაუბრო, თუ რაიმე აქვთ სათქმელი, ერთმანეთს ეტყვიან, არც ერთი არ არის ისეთი მორიდებული, რომ საზოგადოებას არ უთხრას, რა ხდება“, – განაცხადა კუბლაშვილმა.
შეგახსენებთ, დღეს "გირჩის" ლიდერმა ზურაბ ჯაფარიძემ სოციალურ ქსელში დაწერა, რომ ის პარტიულ თანამშრომლობას წყვეტს იაგო ხვიჩიასთან, ვახტანგ მეგრელიშვილთან და ალექსანდრე რაქვიაშვილთან. მისი მტკიცებით, აღნიშნული გადაწყვეტილება იაგო ხვიჩიას ფეისბუქ სტატუსებს არ უკავშირდება.
თუმცა, 3 დეკემბერს, ზურაბ ჯაფარიძემ აღიარა, რომ იაგო ხვიჩიას განცხადებებით "გირჩს" ზიანი მიადგა.
ცნობისთვის, "გირჩის" ერთ-ერთმა ლიდერმა, იაგო ხვიჩიამ სოციალურ ქსელში კომენტარი დაწერა, რომელშიც შინაგან საქმეთა სამინისტროს მიერ წინასწარი შეცნობით არასრულწლოვანთა გამოსახულების შემცველი პორნოგრაფიის შეძენა, შენახვა, ფლობა, სარგებლობის მუხლით პირის დაკავებას გამოემაურა.
"ანუ? პორნო გადმოწერა, დაასეივა, ერთხელაც გადაწყვიტა ესარგებლა და დაიჭირეს? სულ გააფრინეს". - დაწერა მან.
აღნიშნულ კომენტარს, სოციალურ ქსელში კრიტიკა მოჰყვა.
განცხადება გაავრცელა გირჩის თანამფუძნებელმაც. ნინო დარსაველიძე იაგო ხვიჩიას განცხადებების გამო დამფუძნებელთა საერთო კრების მოწვევას ითხოვს.
