გაეროს ყოფილი გენერალური მდივანი პან გი მუნი საერთაშორისო ოლიმპიური კომიტეტის (სოკ) ეთიკის კომისიის თავმჯდომარედ მეორე ვადით აირჩიეს. ეს საერთაშორისო ოლიმპიური კომიტეტის 138-ე სესიაზე მოხდა, რომელიც ტოკიოში იმართება.
პან გი მუნის კანდიდატურას საერთაშორისო ოლიმპიური კომიტეტის 71 წევრიდან 70-მა დაუჭირა მხარი.
"მინდა კიდევ ოთხი წლის არჩევისთვის გულწრფელი მადლიერება გამოვხატო. ჩემთვის ამ თანამდებობაზე მუშაობა პატივი და პრივილეგიაა", - განაცხადა მან.
პან გი მუნი გაერო-ს გენერალური მდივნის თანამდებობას 2007 წლის 1 იანვრიდან 2016 წლის 31 დეკემბრამდე იკავებდა.