აშშ-ის სურსათისა და მედიკამენტების ადმინისტრაციამ კორონავირუსის სამკურნალო პრეპარატი RegN-COV2, რომელიც კომპანია Regeneron Pharmaceuticals-ის მიერ არის დამზადებული, 21 ნოემბერს, სასწრაფო წესით დაარეგისტრირა.
ამრიგად, პრეპარატს, რომელიც ორი ტიპის მონოკლონური ანტისხეულების "კოქტეილს" წარმოადგენს, შეერთებულ შტატებში 12 წელს მიღწეული პაციენტების სამკურნალოდ გამოიყენებენ.
გავრცელებული ინფორმაციით, აშშ-ის სურსათისა და მედიკამენტების ადმინისტრაციამ პრეპარატი მცირე კლინიკური კვლევების საფუძველზე დაარეგისტრირა, რომელშიც მონაწილეობა 799-მა პაციენტმა მიიღო.
The New York Times-ის თანახმად, აშშ-ის მთავრობამ კომპანია Regeneron-სთვის REGN-COV2-ის განვითარების მიზნით, 500 მილიონი აშშ დოლარი გამოყო.
მწარმოებლები აღნიშნავენ, რომ პრეპარატის გამოყენება ეფექტური სიმპტომების გამოვლენის საწყის ეტაპზეა.
აღსანიშნავია, რომ REGN-COV2-ს აშშ-ის პრეზიდენტის დონალდ ტრამპის სამკურნალოდ იყენებდნენ, რომელიც კორონავირუსით ოქტომბერში დაინფიცირდა. პოლიტიკოსმა თავად აღნიშნა, რომ პრეპარატის მიღების შემდეგ თავს კარგად გრძნობდა.