აშშ-ის სახელმწიფო მდივნის განცხადებით, იმ პირობებში, როცა დაჯგუფება "თალიბანი" ქაბულში შევიდა, აშშ-ის ინტერესებში არ შედის ავღანეთში დარჩენა.
გავრცელებული ინფორმაციით, ენტონი ბლინკენი აცხადებს, რომ ვაშინგტონმა მილიარდები დახარჯა ავღანეთის ძალების გადამზადებისთვის, რითაც მათ "თალიბანზე" უპირატესობა უნდა მოეპოვებინათ, მაგრამ მათ ვერ მოახერხეს დაჯგუფების წინსვლის შეჩერება.
მისი თქმით, ავღანეთის შეიარაღებულმა ძალებმა ქვეყნის დაცვა ვერ შეძლო და ეს მოსალოდნელზე სწრაფად მოხდა.
ცნობისთვის, დაჯგუფება "თალიბანი" დღეს ავღანეთის დედაქალაქში შეიჭრა. ავღანეთის მთავრობას და დაჯგუფების წარმომადგენლებს შორის, ხელისუფლების მშვიდობიანი გზით გადაცემის შესახებ მოლაპარაკებები მიმდინარეობდა. მოგვიანებით, ავღანეთის პრეზიდენტმა აშრაფ ღანიმ ქვეყნის დატოვების გადაწყვეტილება მიიღო.
