ირანის საგარეო საქმეთა სამინისტრო, ტერორისტული დაჯგუფება "ალ-ქაიდას" ერთ-ერთი ლიდერის ლიკვიდაციის შესახებ NYT-ის სტატიის გავრცელების შემდეგ, ქვეყანაში ტერორისტული ჯგუფის წევრების ყოფნის ფაქტს უარყოფს. ამის შესახებ ირანის საგარეო საქმეთა სამინისტროს სპიკერმა საიდ ჰატიბზადემ განაცხადა.
ჰატიბზადემ ასევე აღნიშნა, რომ "ალ-ქაიდა" რეგიონში აშშ-ის მცდარი ამერიკული პოლიტიკის შედეგად შეიქმნა და ამგვარი განცხადებებით შეერთებული შტატები და ისრაელი, პასუხისმგებლობისთვის თავის არიდებას ცდილობენ.
ცნობისთვის, New York Times-ის მიერ გამოქვეყნებული სტატიის თანახმად, ისრაელის სპეცსამსახურებმა, სამი თვის წინ, ირანში ტერორისტული დაჯგუფება "ალ-ქაიდას" ერთ-ერთი ლიდერი, აბდულა აჰმედ აბდულა მოკლეს, რომელიც კენიასა და ტანზანიაში აშშ-ის საელჩოებთან მომხდარი ტერორისტული თავდასხმების ორგანიზებაშია ეჭვმიტანილი.
