რუსეთის მოქალაქეს, ეგორ იგორევიჩ კრიუჩკოვს ილონ მასკის კუთვნილ, ამერიკულ ენერგოკომპანია Tesla-ზე კიბერშეტევის განხორციელების მცდელობა ედება ბრალად. ამის შესახებ საინფორმაციო სააგენტო Deutsche Welle იუწყება.
გამოცემის ცნობით, ეგორ იგორევიჩ კრიუჩკოვი, კომპანიის კუთვნილ კომპიუტერში ვირუსის გავრცელების მიზნით, Tesla-ს თანამშრომლის მოსყიდვას ცდილობდა. რუსეთის მოქალაქე ლოს-ანჯელესში 22 აგვისტოს დააკავეს. ნევადას შტატის ფედერალურმა სასამართლომ კრიუჩკოვს ოფიციალურად ბრალი 4 სექტემბერს წაუყენა.
აშშ-ის იუსტიციის დეპარტამენტის მიერ გავრცელებული განცხადების თანახმად, პროკურატურა მიიჩნევს, რომ რუსეთის მოქალაქეს კომპანიის მონაცემების მოპოვება და კომპრომატების მეშვეობით მისი დაშანტაჟება სურდა. კომპანიის თანამშრომელს საიდუმლო ინფორმაციის გამჟღავნებისათვის 1 მილიონი აშშ დოლარი შესთავაზეს, თუმცა მან თანამშრომლობაზე უარი განაცხადა და დასახმარებლად FBI–ის მიმართა.
