რუსეთის რამდენიმე ქალაქში ოპოზიციონერი ალესეი ნავალნის მხარდასაჭერ აქციაზე სამართალდამცავებმა 2 000-ზე მეტი მომიტინგე დააკავეს. ამის შესახებ საინფორმაციო სააგენტო Reuters იუწყება.
23 იანვარს ალექსეი ნავალნის გათავისუფლების მოთხოვნით აქციები რუსეთის 60-მდე ქალაქში გაიმართა.
დაკავებულთა შორის იყო ალექსეი ნავალნის მეუღლე, იულია ნავალნაია, რომელიც პოლიციამ მოგვიანებით გაათავისუფლა.
ცნობისთვის, ხიმკის სასამართლომ რუს ოპოზიციონერს,ალექსეი ნავალნის 30-დღიანი პატიმრობა შეუფარდა.
რუსეთის სამართალდამცავი ორგანოების თანამშრომლებმა გერმანიიდან დაბრუნებული ოპოზიციონერი ალექსეი ნავალნი 17 იანვარს, ღამით "შერემეტიევოს" აეროპორტში, საპასპორტო კონტროლზე, პირობითი სასჯელის დარღვევის მიზეზით დააკავეს.
შეგახსენებთ, 2020 წლის აგვისტოში, მოსკოვში მიმავალი რუსი ოპოზიციონერი, ალექსეი ნავალნი თვითმფრინავში ცუდად გახდა და ავიალაინერის სასწრაფოდ დაშვება გახდა საჭირო. ნავალნი ომსკის საავადმყოფოში ტოქსიკოლოგიურ განყოფილებაში მოათავსეს, საიდანაც სამკურნალოდ ბერლინის საავადმყოფოში გადაიყვანეს. გერმანიაში ჩატარებულმა სამედიცინო კვლევამ დაადგინა, რომ რუსი ოპოზიციონერი ნერვული აგენტით, "ნოვიჩოკით" იყო მოწამლული და ფაქტი კრემლის მხრიდან ოპოზიციონერის მკვლელობის მცდელობად შეფასდა. რუსეთის ხელისუფლება ბრალდებებს უარყოფს და აცხადებს, რომ ინციდენტთან კავშირი არ აქვს.
