აშშ-ის პრეზიდენტის, ჯო ბაიდენის მიერ სომეხთა გენოციდის აღიარებასთან დაკავშირებით, თურქეთში აშშ-ის საელჩო და საკონსულოები დროებით დაიხურება. ამის შესახებ განცხადება თურქეთში აშშ-ის საელჩოს ოფიციალურ ვებ-გვერდზე გამოქვეყნდა.
დიპლომატიური ოფისები 26-27 აპრილს მუშაობას შეაჩერებენ.
ამრიგად, მუშაობას შეაჩერებს ანკარაში აშშ-ის საელჩო, სტამბოლში აშშ-ის გენერალური საკონსულო, ადანაში აშშ-ის საკონსულო და იზმირში აშშ-ის საკონსულო. შესაბამისად, დროებით შეჩერდება ვიზების გაცემა და მოქალაქეებისათვის მომსახურებების გაწევა.
შეგახსენებთ, 24 აპრილს, აშშ-ის პრეზიდენტმა ჯო ბაიდენმა ოსმალეთის იმპერიის მიერ პირველი მსოფლიო ომის დროს სომეხი მოსახლეობის გენოციდი ოფიციალურად აღიარა. აღნიშნულთან დაკავშირებით, თურქეთის საგარეო საქმეთა სამინისტროში აშშ-ის ელჩი დაიბარეს.
თურქეთის საგარეო საქმეთა მინისტრმა მევლუთ ჩავუშოღლუმ განაცხადა, რომ ანკარა უარყოფს აშშ-ის პრეზიდენტის, ჯო ბაიდენის განცხადებას ოსმალეთის იმპერიის მიერ სომხების გენოციდის აღიარების შესახებ.
