აშშ-ის პრეზიდენტის, ჯო ბაიდენის თქმით, ნიუ-იორკის გუბერნატორი, ენდრიუ კუომო სექსუალურ შევიწროებაში გაჟღერებული ბრალდებების შემდეგ უნდა გადადგეს. ამის შესახებ სააგენტო Reuters წერს.
"ვფიქრობ, ის უნდა გადადგეს", - განაცხადა ბაიდენმა.
მანამდე პროკურატურამ განაცხადა, რომ ნიუ-იორკის გუბერნატორი ენდრიუ კომო 10-ზე მეტ ქალს სექსუალურად ავიწროებდა.
თავად გუბერნატორი შევიწროების ბრალდებებზე სამართალწარმოების დასრულებამდე კომენტარის გაკეთებას არ აპირებს. ის არც გადადგომას გეგმავს.
11 მარტს, ნიუ-იორკის შტატის საკანონმდებლო კომიტეტმა ენდრიუ კუომოსათვის გუბერნატორის უფლებამოსილების ჩამორთმევის თაობაზე გამოძიება დაიწყო. შტატის საკანონმდებლო ორგანოს წევრთა უმრავლესობა გუბერნატორის იმპიჩმენტს უჭერს მხარს. თავად კუომო წაყენებულ ბრალდებებს უარყოფს.
შეგახსენებთ, ნიუ-იორკის გუბერნატორის მხრიდან არასათანადო მოქცევის შესახებ განცხადება რამდენიმე ქალმა გააკეთა. თავად კუომოს თქმით, მას მსგავსი არაფერი ჩაუდენია და მისი საქციელი ფლირტად შეცდომით ჩათვალეს. გამოძიებას შტატის გენერალური პროკურატურა აწარმოებს.
