აზერბაიჯანის რკინიგზის შვილობილმა კომპანიამ ADY Container LLC- მა საკონტეინერო მატარებელი ჩინეთიდან აზერბაიჯანისკენ გამოუშვა. მატარებელს 40-ფუტიანი 50 ცალი კონტეინერი მოაქვს. ტვირთი ჩინგადაოდან (ჩინეთი) გამოვიდა და ბაქოში ჩავა. ტვირთი ბაქოს პორტში ყაზახეთის პორტიდან აქტაუდან შემოვა. აქედან 15 კონტეინერი გამოიგზავნება თბილისში.
პროექტი ხორციელდება ტრანსკასპიის საერთაშორისო სატრანსპორტო კონსორციუმის წევრ KTZ Express- თან, ADY Container LLC- ისა და GR Logistics and Terminals- ის თანამშრომლობით.
2021 წლის ბოლოსთვის ADY Container LLC გეგმავს 50 – მდე კონტეინერის ბლოკმატარებლის ტრანსპორტირებას ჩინეთ – აზერბაიჯანის მიმართულებით.
ცნობისთვის, "ბაქო-თბილისი-ყარსის" რკინიგზით ექსპორტი დაიწყო აზერბაიჯანმაც. 2020 წელს ADY Express- მა ბაქო-თბილისი-ყარსის რკინიგზით ჯამში 49,739 ტონა ტვირთი გადაიზიდა, აქედან 97% ტრანზიტული ტვირთია, 3% კი იმპორტირებული. შედარებისთვის, 2019 წელს კომპანიამ მოახერხა 25 722 ტონა ტვირთის გადაზიდვა ბაქო-თბილისი-ყარსის რკინიგზით.
შეგახსენებთ, თურქეთმა რუსეთში ექსპორტი "ბაქო-თბილისი-ყარისის" დერეფნით 2021 წლის იანვარში უკვე დაიწყო. ამავე მაგისტრალზე ოდნავ ადრე, 2020 წლის ბოლოს ექსპორტი თურქეთმა ჩინეთშიც დაიწყო. თურქეთიდან ჩინეთში საექსპორტო მატერებელმა ორი რეისი განახორციელა. ჩინეთამდე ორ პარტიად შევიდა თურქული BSH-მაცივრები.
აქამდე ამ მაგისტრალზე ძირითადად ჩინური ექპსორტი მოძრაობდა. საქართველოში ამტკიცებენ, რომ ამ მაგისტრალზე ჩინური იმპორტის გადაზიდვა ხელს შეუწყობს ტვირთბრუნვის და ეკონომიკური ეფექტის ზრდას.
საქართველოს ეკონომიკის სამინისტროს ინფორმაციით, ბაქო-თბილისი-ყარსის რკინიგზაზე ჩინეთიდან/კენ გადაზიდვები 371.9%-ით გაიზარდა.
ეკონომიკის სამინისტროს მონაცემებით, 2020 წლის იანვარ-ოქტომბრის პერიოდში შუა დერეფანზე ჩინეთიდან/კენ საქართველოს გავლით გადაზიდულმა კონტეინერების რაოდენობამ შეადგინა 2343 TEU, რაც 2019 წლის ანალოგიურ პერიოდთან შედარებით 35.1%-ით მეტია (1734 TEU).
უწყების ინფორმაციით, 2020 წლის იანვარ-ოქტომბრის პერიოდში ბაქო-თბილისი-ყარსის სარკინიგზო მაგისტრალით, BTK-თი, გადაიზიდა 1260 TEU, რაც 2019 წლის ანალოგიურ პერიოდთან შედარებით 371.9%-ით მეტია (267 TEU).
ეკონომიკის მინისტრის შეფასებით, ბაქო-თბილისი-ყარსის სარკინიგზო მაგისტრალი ჩინეთ-ევროპას შორის უმოკლესი გზაა, რაც აიაფებს ტვირთს და საქართველოს კონკურენტუნარიანობას ზრდის ამ დერეფანში. ნათია თურნავას თქმით, ბაქო-თბილისი-ყარსი, ახალი ამ მაგისტრალზე დღემდე დაახლოებით 400 000 ტონა ტვირთი გადაიზიდა.
ცნობისთვის, ბაქო-თბილისი-ყარსი (BTK) ახალი სარკინიგზო მარშრუტია, რომელიც საქართველოზე გავლით, ევროპასა და აზიას ერთმანეთთან აკავშირებს. მისი მშენებლობა 2008 წელს დაიწყო და 2017 წელს დასრულდა. სარკინიგზო მაგისტრალი სატესტო რეჟიმში 2017 წლიდან მოქმედებს. სატვირთო ტრანზიტისთვის სარკინიგზო მარშრუტი აქტიურია 2018 წლიდან.
იმისთვის, რომ გაიგოთ ყველა დეტალი, თუ როგორ მუშაობს, რა ეკონომიკური ეფექტი აქვს საქართველოსთვის, პარტნიორი ქვეყნებისთვის და რეგიონისთვის ბაქო-თბილისი-ყარსის სარკინიგზო მაგისტრალს, იკითხეთ, report.ge-ს ეკონომიკური ანალიტიკა.
ბელა გელაშვილი
ავტორი