გიორგი შაქარაშვილის საქმეზე დაკავებული არასრულწლოვნების საქმის განხილვა გრძელდება. პროცესი მცხეთის რაიონულ სასამართლოში დღეს გაიმართება. დღევანდელ პროცესზე ბრალდების მხარის მოწმეები, ის პოლიციელები და ექსპერტები დაიკითხებიან, რომლებმაც გარკვეული საპროცესო მოქმედებები განახორციელეს.
ასევე, იგეგმება მთავარი მოწმეების გამოკითხვაც, რომლებსაც საქმეში დაზარალებულის სტატუსი აქვთ.
რაც შეეხება გიორგი შაქარაშვილის ჯგუფურად განზრახ მკვლელობის საქმეს, მცხეთის რაიონულ სასამართლოში პროცესი 15 სექტემბრამდე გადაიდო.
შეგახსენებთ, 19 ივნისს, დაახლოებით 11:00 საათზე გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები. 4-დღიანი უწყვეტი საძიებო სამუშაოების შედეგად მყვინთავებმა ფეხბურთელ გიორგი შაქარაშვილის ცხედარი წყალში იპოვეს.
შინაგან საქმეთა სამინისტრომ ფეხბურთელ გიორგი შაქარაშვილის საქმეზე 26 ივნისს 17 ადამიანი დააკავა.
28 ივნისს გიორგი შაქარაშვილის საქმეზე ბრალდებულ 17 პირს აღკვეთის სახით პატიმრობა შეეფარდა.
10 ივლისს პროკურატურამ გაავრცელა ინფორმაცია, რომლის თანახმადაც, გიორგი შაქარაშვილის სიკვდილის მიზეზია ასფიქსია წყალში დახრჩობით.ამასთან, ექსპერტიზის დასკვნით გაირკვა, რომ მას გარდაცვალებამდე მკვრივი-ბლაგვი საგნით მიყენებული დაზიანებები აქვს.
გენპროკურატურამ შაქარაშვილის საქმეზე 11 ბრალდებულის საქმეცალკე წარმოებად გამოყო. გიორგი შაქარაშვილის საქმეზე ხუთ დაკავებულს ბრალი დაუმძიმდა.
საქართველოს გენერალურმა პროკურატურამ გიორგი შაქარაშვილის დამამძიმებელ გარემოებებში განზრახ მკვლელობის ბრალდებით სისხლის სამართლებრივი დევნა ხუთი პირის მიმართ დაიწყო.
