გარდაცვლილი პროგრამისტის, თამარ ბაჩალიაშვილის ოჯახის წევრები დღეს შინაგან საქმეთა სამინისტროში მივლენ. ოჯახს უწყებაში 11:00 საათზე ელოდებიან.
როგორც ბაჩალიაშვილის ოჯახის ადვოკატმა მიხეილ რამიშვილმა ჟურნალისტებს განუცხადა, გამოძიებაში FBI-ის ჩართულობისთვის შსს-ის მზაობა წინგადადგმული ნაბიჯია, თუმცა აღნიშნულ საკითხზე ვადებთან დაკავშირებით მთავარი არის პროკურატურის გადაწყვეტილება. მისი თქმით, ფედერალური ბიუროს წარმომადგენლების მოწვევა დაჩქარებულად უნდა მოხდეს.
ცნობისთვის, თამარ ბაჩალიაშვილის საქმესთან დაკავშირებით საქართველოს შინაგან საქმეთა სამინისტრო, ამერიკის ფედერალურ საგამოძიებო ბიუროსთან თანამშრომლობის შესახებ მზადყოფნას გამოთქვამს. ინფორმაცია report.ge-ს შსს-ში დაუდასტურეს.
"შინაგან საქმეთა სამინისტრო დაუკავშირდა თამარ ბაჩალიაშვილის ოჯახის ადვოკატს მათ მიერ გაკეთებულ განცხადებასთან დაკავშირებით, რომელიც ეხებოდა საქმეში ამერიკის ფედერალური ბიუროს ჩართულობას. სამინისტრო გამოთქვამს მზადყოფნას აღნიშნულ პროცესში ამერიკის საგამოძიებო ბიუროსთან თანამშრომლობის შესახებ და ამ მიზნით დღეს ოჯახს შეხვედრა შესთავაზა“, - აცხადებენ უწყებაში.
შეგახსენებთ, ოჯახმა 4 აგვისტოს, საქართველოში შეერთებული შტატების საელჩოსთან საპროტესტო აქცია გამართა და გამოძიების პროცესში FBI-ს ჩართვა მოითხოვა. რის შემდეგაც მათ საელჩოს წარმომადგენელი შეხვდა და განუმარტა, რომ FBI-ს ჩართვის მოთხოვნა სახელწმიფოს პრეროგატივაა.
შეგახსენებთ, ფონიჭალიდან გაუჩინარებული 23 წლის თამარ ბაჩალიაშვილი, 4 დღის შემდეგ, 22 ივლისს, თეთრიწყაროში, საკუთარ ავტომობილში გარდაცვლილი იპოვეს. საქმეზე გამოძიება თავისუფლების უკანონო აღკვეთისა და თვითმკვლელობამდე მიყვანის მუხლებით მიმდინარეობს.
ოჯახის მოთხოვნით, საქმის გამოძიებას თბილისის ცენტრალური კრიმინალური პოლიციის დეპარტამენტი აწარმოებს.
