იაპონიის ხელისუფლება ოლიმპიადაზე უცხოური დელეგაციების რიცხვს შეამცირებს. მიზეზი კორონავირუსის პანდემიასთან დაკავშირებული შეზღუდვებია. ინფორმაციას ამის შესახებ სააგენტო Kyodo ავრცელებს.
კერძოდ, თანმდევი პერსონალი სახელმწიფოების ლიდერებისთვის 11 ადამიანამდე შემცირდება, მინისტრთა კაბინეტის წევრებისთვის - 5 ადამიანამდე. ამასთან, VIP-სტუმრებს იაპონიაში ჩასვლამდე სულ მცირე 72 საათით ადრე ჩატარებული, კორონავირუსზე ტესტის უარყოფითი პასუხი მოეთხოვებათ.
მანამდე გაზეთმა Sankei გამოაქვეყნა ინფორმაცია, რომ იაპონიის ხელისუფლება ასევე განიხილავს მაყურებლების ადგილების 50%-ით შემცირებას გეგმავს.
შეგახსენებთ, რომ ტოკიოში ოლიმპიური თამაშები, რომელიც შარშან ახალი კორონავირუსის გავრცელების გამო გადაიდო, ამ წლის 23 ივლისიდან 8 აგვისტომდე პერიოდში გაიმართება.
