თავში

ხორცი გაძვირდა

ხორცი გაძვირდა
ხორცი გაძვირდა

გაეროს სურსათის და სოფლის მეურნეობის ორგანიზაციის, FAO-ს, ფასების ინდექსი, რომელიც სამომხმარებლო კალათის 5 ძირითადი პროდუქტის (რძე, მარცვლეული, მცენარეული ზეთი, შაქარი, ხორცი) საერთაშორისო ფასების ცვალებადობას ასახავს, 6-წლიან მაქსიმუმზეა. ანუ ინდექსმა 113.3 ქულა შეადგინა, რაც 2014 წლის ივლისის თვის შემდგომ, FAO-ს ფასების ინდექსის ყველაზე მაღალი მაჩვენებელია. მაჩვენებელი 2020 წლის დეკემბრის ფასებთან შედარებით 4.3%-ითაა გაზრდილი.

ხორცი ადამიანის კვების რაციონის ერთ-ერთი მთავარი კომპონენტია და მისი მიღება აუცილებელია ჯანმრთელობისთვის. პანდემიური კრიზისის გამო ,უმუშევრობის ზრდისა და მოქალაქეთა შემოსავლების კლების პარალელურად, მსოფლიოში ხორცი გაძვირდა.  დეკემბერთან შედარებით, 1%-ითაა გაზრდილი ხორცის ფასების ინდექსი. ხორცის გაძვირების  მთავარ მიზეზად, ბრაზილიაში ფრინველის გრიპის შედეგად, ფრინველის ხორცის წარმოებაში წარმოქმნილი შეფერხება სახელდება.

საქართველოში კვერცხი თვითკმარი პროდუქტია, თუმცა ფრინველის მეხორცულ მიმართულებაში ადგილობრივ ნაწარმს იმპორტირებულთან კონკურენცია ჭირს და ადგილობრივი ბაზრის დიდი წილი შემოტანილ ხორცს უჭირავს, შედეგად, ფროვნელის ხორცი, მსოფლიო ბაზრის კვალდაკვალ, გაძვირდა საქართველოშიც. 

ცნობისთვის, ფრინველის ხორცის მარკეტინგული მოთხოვნების შესახებ რეგლამენტი, რომელიც 2020 წლის ოქტომბერში შევიდა ძალაში, დროებით შეჩერდა. მთავრობის შესაბამისი დადგენილება საკანონმდებლო მაცნეზე დღეს გამოქვეყნდა. ტექნიკური რეგლამენტი 2021 წლის 1 აპრილამდეა შეჩერებული.

რეგულაცია 2020 წლის აპრილში უნდა ამოქმედებულიყო, მაგრამ მთავრობის გადაწყვეტილებით, ის ძალაში 2020 წლის 20 ოქტომბერს შევიდა.

საქართველოს მთავრობის დადგენილების მიხედვით, იმპორტირებული ფრინველის ხორცს თან უნდა ახლდეს წარმოშობის ქვეყნის კომპეტენტური ორგანოს მიერ გაცემული ტექნიკური რეგლამენტის მოთხოვნებთან შესაბამისობის დოკუმენტი. მასში მითითებულ გაყინულ და სწრაფად გაყინულ ფრინველის ნაჭრებში, წყლის საერთო რაოდენობა უნდა განისაზღვროს არაუმეტეს 5%-ისა.

გარემოს დაცვის და სოფლის მეურნეობის მინისტრი, ლევან დავითაშვილი ირწმუნებოდა, რომ საქართველოში ფრინველის ხორცზე დეფიციტი არ შეიქმნებოდა.

2020 წლის III კვარტლის განმავლობაში სასაკლაოებში დაკლული ფრინველის რაოდენობა 3 236.4 ათასი ერთეულით განისაზღვრა.

ამავე პერიოდში სასაკლაოების მიერ წარმოებული იქნა 10 224.1 ტონა ხორცი (იგულისხმება დაკლული წონა, ფრინველის ხორცის ჩათვლით), საიდანაც 29.2 პროცენტი მოდის მსხვილფეხა რქოსანი პირუტყვის ხორცზე, 46.8 პროცენტი - ფრინველის, 23.2 პროცენტი - ღორის, 0.6 პროცენტი - ცხვრისა და თხის ხორცზე, ხოლო დანარჩენს უმნიშვნელო წილი უკავია.

შემცირებულია კვერცხის ადგილობრივი წარმოებაც. კლება ფიქსირდება ასევეხორცის ქართულ წარმოებაში, ხოლო რძის წარმოება საქართველომ მცირედით გაზარდა.

შეგახსენებთ, covid-19-ის უარყოფითი გავლენას მეფრინველეობის სექტორი ყველაზე უკეთ გადაურჩა,საოჯახო მეურნეობებში წარმოებული ფრინველის ხორცის წარმოება მცირედით გაიზარდა, თუმცა პანდემიამ დააზარალა ფრინველის ხორცის მწარმოებელი მცირე და საშუალო ზომის ფერმერები ტურიზმის სექტორის ჩაკეტვის, საკვების გაძვირების და მოსახლეობის მსყიდველთუნარიანობის შემცირების გამო.მათ დამატეითი პრობლემა გაუჩინა ლარის გაუფასურებამ.

ფრინველის ხორცის თვითუზრუნველყოფის კოეფიციენტი 27-30% ფარგლებშია, რაც მიუთითებს, რომ ფრინველის ხორცის ინდუსტრიული წარმოების განვითარება ქვეყანაში კვლავ გამოწვევაა. საქართველო წელიწადში საშუალოდ 75 000 ტონამდე ფრინველის ხორცს მოიხმარს, ხოლო ადგილობრივი წარმოება დაახლოებით 22 000 ტონას შეადგენს.

ტექსტში შეცდომის აღმოჩენისას, გთხოვთ, მონიშნოთ არასწორი ნაწილი და დააჭირეთ Ctrl + Enter.

კატეგორიის სხვა ახალი ამბები

ბოლო სიახლეები

ბოლო სიახლეები



orphus_system