ჟურნალისტი და ტელეწამყვანი ნოდარ მელაძე სახელმწიფო უსაფრთხოების სამსახურში დაიბარეს. ამის შესახებ TV პირველის წამყვანმა, ჟურნალისტმა ინგა გრიგოლიამ პირდაპირ ეთერში განაცხადა.
გრიგოლიას ინფორმაციით, საქმე ეხება ტელეკომპანია "მთავარის" წამყვანის, გიორგი გაბუნიას შეკვეთილი მკვლელობის მომზადების საქმეს.
სავარაუდოდ, სახელმწიფო უსაფრთხოების სამსახური „ნოდარ მელაძის შაბათში“ გასული სიუჟეტით დაინტერესდა, სადაც ჟურნალისტ გიორგი გაბუნიას შესაძლო ლიკვიდაციის საქმეზე დაკავებული, ვასამბეკ ბოკოვის ძმა საუბრობს და აღნიშნავს, რომ მისი ძმის დაკავების კადრების ნახვამ ეჭვი გაუჩინა. სატელეფონო ინტერვიუში ის აღნიშნავს, რომ დაკავებული პირის ფიზიკური მონაცემები მისი ძმისგან განსხვავდება.
როგორც report.ge-ს სახელმწიფო უსაფრთხოების სამსახურში განუმარტეს, ნოდარ მელაძეს გამოკითხვაზე ხვალ, 11:00 საათზე ელოდებიან.
15 ივნისს, ტელეკომპანიებმა - "ფორმულამ" და „მთავარმა არხმა“ გაავრცელეს ინფორმაცია, რომ 12 ივნისს თბილისში ჩატარებული სპეცოპერაციისას დაკავებული რუსეთის მოქალაქე ტელეკომპანიის ჟურნალისტის, გიორგი გაბუნიას ლიკვიდაციას გეგმავდა.
იმავე დღეს სახელმწიფო უსაფრთხოების სამსახურში დაადასტურეს, რომ სპეცოპერაციისას დაკავებულ მოქალაქეს ედავებიან შეკვეთით განზრახ მკვლელობის მომზადების ფაქტს, თუმცა მათ არ დაუკონკრეტებიათ, არის თუ არა საუბარი გიორგი გაბუნიაზე.
გიორგი გაბუნიასა და "მთავარი არხის" დირექტორის, ნიკა გვარამიას მტკიცებით, ჟურნლისტის მკვლელობა ჩეჩნეთის ლიდერმა, რამზან კადიროვმა შეუკვეთა.
აღნიშნულ განცხადებებს კადიროვის პასუხი მოჰყვა, რომელმაც გაბუნიას მოუწოდა, დაიჩოქოს და ბოდიში მოიხადოს, წინააღმდეგ შემთხვევაში ის, მისი პირადი მტერი გახდება. თავის მხრივ, გაბუნუამ კადიროვს უპასუხა, რომ მას სიკვდილის არ ეშინია და კადიროვი დაჩოქილს ვერასოდეს ნახავს.
გასული წლის ივლისში, მას შემდეგ, რაც გიორგი გაბუნიამ, რომელიც იმ დროს ტელეკომპანია „რუსთავი2”-ში მუშაობდა, რუსეთის პრეზიდენტს პირდაპირ ეთერში აგინა, ჟურნალისტს დაემუქრნენ, როგორც ჩეჩნეთის ლიდერი, რამზან კადიროვი, ისე ერთ-ერთი რუსი ბლოგერი.
გიორგი გაბუნიამ და ნიკა გვარამიამ ჩვენება საქალაქო სასამართლოში, მაგისტრი მოსამართლის თანდასწრებით მისცეს. გაბუნიან გაბუნიამ პროკურატურისგან სახელმწიფო დაცვის შეთავაზება მიიღო, რასაც ჟურნალისტი გარკვეული ფიქრის შემდეგ დათანხმდა.
