ცენტრალურ საარჩევნო კომისიასთან, სადაც საპროტესტო აქცია მიმდინარეობს, ამ წუთებში აქტივისტები საქართველოს ჰიმნს ასრულებენ. ადგილზე უკვე მივიდა კოლონა, რომელიც ოპოზიციონერი ლიდერების წინამძღოლობით რუსთაველის გამზირიდან გაემართა.
ცოტა ხნისწინ აქციაზე, წყლის ჭავლის გამოყენების შემდეგ, გაურკვეველი, სპეციფიური სუნის მქონე ნივთიერება გაუშვეს.
როგორც report.ge-ს კორესპონდენტი ადგილიდან იუწყებოდა გაზის მსგავსი ნივთიერების გაშვების შედეგად გაძნელებული იყო სუნთქვა.
მისივე ცნობით, აქციაზე ისმის გამაფრთხილებელი სიგნალი, რომელიც აქციის მონაწილეებს ატყობინებს, რომ თუ არ დაიშლებიან, მათ წინააღმდეგ გამოყენებული იქნება კანონით გათვალისწინებული ზომები.
ცნობისთვის, ცესკო-სთან მიმდინარე საპროტესტო აქციის მონაწილეები, რომლებიც წყლის ჭავლის გამოყენებით დაშალეს, კვლავ უკან დაბრუნდნენ და ცოცხალი ჯაჭვი გააკეთეს.
პოლიციამ აქციის მონაწილეების წინააღმდეგ წყლის ჭავლი მას შემდეგ გამოიყენა, რაც მოქალაქეების ნაწილმა ცესკო-სთან აღმართული რკინის ჯებირის გარღვევა სცადა.
წყლის ჭავლის გამოყენების დროს კი მათ პოლიციას ქვები დაუშინეს. დაშავდა რამდენმე ადამიანი.
ადგილზე მობილიზებულია სპედანიშნულების რაზმები.
ცოტა ხნის წინ განცხადება გაავრცელა შინაგან საქმეთა სამინისტრომ, სადაც აღნიშნულია, რომ აქციის მონაწილეები იყენებდნენ ძალადობრივ მეთოდებს და არ ემორჩილებოდნენ პოლიციის მითითებებს, შინაგან საქმეთა სამინისტრომ კი მისთვის კანონით მინიჭებული უფლებამოსილების ფარგლებში გამოიყენა პროპორციული ძალა
საპროტესტო კოლონა რუსთაველის გამზირიდან ცესკო-ს მიმართულებით მას შემდეგ გაემართა, რაც ოპოზიციის მხრიდან "ქართული ოცნებისთვის" წაყენებული ულტიმატუმის ვადა ამოიწურა.
ოპოზიციის მთავარი მოთხოვნა ცესკო-ს თავმჯდომარის, თამარ ჟვანიას თანამდებობიდან გადაყენება და ვადამდელი არჩევნების დანიშნვაა. რუსთაველზე გამართულ აქციაზე ასევე გაჟღერდა მოთხოვნა პოლიტპატიმრების გათავისუფლების შესახებ.
